Benki ya Capital One yaeleza sababu kufunga akaunti za Trump

Dar es Salaam. Benki ya Capital One Financial imeieleza mahakama, uamuzi wake wa kufunga zaidi ya akaunti 300 zilizokuwa zinahusishwa na Kampuni ya Trump mwaka 2021 ulitokana na tathimini ya wataalamu wa kudhibiti utakatishaji fedha, ikipinga madai kuwa hatua hiyo ilichochewa na misimamo ya kisiasa. Katika nyaraka zilizowasilishwa mahakamani Ijumaa, Capital One imeomba kesi iliyofunguliwa dhidi yake itupiliwe mbali, ikieleza akaunti hizo hazikufungwa kwa misingi ya kisiasa au kidini, bali baada ya uchambuzi uliofanywa na kitengo chake cha kupambana na utakatishaji fedha (AML) kwa kuzingatia sera za benki na miongozo ya wasimamizi wa sekta ya fedha. Hii ni mara ya kwanza kwa benki kueleza rasmi mahakamani kuwa sababu za udhibiti wa utakatishaji fedha zilihusika katika uamuzi wa kufunga akaunti za biashara ya familia ya Rais wa Marekani, Donald Trump. Hata hivyo, Capital One imesisitiza kuwa haijawahi kuituhumu Kampuni ya Trump kujihusisha na utakatishaji fedha haramu, bali ilichukua hatua hiyo baada ya tathimini ya ndani kuhusu miamala iliyokuwa ikifanyika kwenye akaunti hizo. Benki hiyo ilitoa taarifa Machi, 2021 kuhusu mpango wake wa kufunga zaidi ya akaunti 300 zilizokuwa zinahusishwa na kampuni ya Trump (Trump Organization). Machi 2025, Trump Organization pamoja na Eric Trump, mtoto wa Trump, waliifungulia Capital One kesi katika Mahakama ya Shirikisho ya Florida wakidai benki hiyo ilifunga akaunti hizo kutokana na kile walichokiita msimamo wa kibaguzi ‘woke’ na kutaka kuendana na hali ya kisiasa iliyofuatia vurugu za Januari 6, 2021 katika jengo la Bunge la Marekani. Mahakama ya Shirikisho ya Miami tayari imeshatupilia mbali mara mbili malalamiko yaliyowasilishwa na walalamikaji, lakini kila mara imewapa nafasi ya kurekebisha na kuwasilisha upya hati ya madai. Capital One imeieleza mahakama kuwa hati mpya ya madai iliyowasilishwa Julai mwaka huu bado ina upungufu uleule uliokuwapo katika malalamiko yaliyotangulia. Aidha, benki hiyo imeeleza kuwa madai ya Trump Organization kwamba kufungwa kwa akaunti kulichochewa na sababu za kisiasa hayana msingi, ikidai yamejengwa juu ya nukuu zilizochaguliwa kwa upendeleo bila kuzingatia muktadha mzima wa nyaraka zilizowasilishwa mahakamani. Kwa mujibu wa Capital One, aina ya miamala iliyobainika kwenye akaunti hizo ni miongoni mwa shughuli ambazo miongozo ya mamlaka za fedha nchini Marekani, huzitambua kama zinazostahili kufanyiwa uchunguzi wa kina kwa madhumuni ya kudhibiti utakatishaji fedha. Kesi hiyo inaendelea wakati utawala wa Rais Donald Trump katika muhula wake wa pili ukiendelea kuishinikiza sekta ya benki, ukisisitiza madai ya wahafidhina kuwa baadhi ya taasisi kubwa za kifedha zimekuwa zikiwabagua wateja kutokana na misimamo yao ya kisiasa. Mwaka 2019, wakati wa muhula wake wa kwanza madarakani, Trump aliishtaki Capital One pamoja na Deutsche Bank akitaka kuzizuia benki hizo kutoa taarifa zake za kifedha kwa Bunge la Marekani, ambalo wakati huo lilikuwa linaendesha uchunguzi ulioongozwa na wabunge wa Chama cha Democratic. Habari hii imeandikwa kwa msaada wa Shirika la Habari la Reuters.