Dar es Salaam. Serikali imezindua kikosi kazi cha kitaifa cha uongozi wa shule kitakachokuwa na jukumu la kushauri kuhusu sera na mikakati ya kuboresha usimamizi wa shule, kuimarisha uwezo wa wakuu wa shule na kukuza tafiti zinazolenga kuboresha matokeo ya ujifunzaji.
Hatua hiyo inalenga kuimarisha nafasi ya viongozi wa shule katika kuboresha ubora wa elimu, kwa kuzingatia kuwa mafanikio ya ufundishaji hayaishii katika uwezo wa walimu pekee, bali pia yanategemea uongozi unaowawezesha kutekeleza majukumu yao kwa ufanisi.
Akizindua kikosi kazi hicho Novemba 20,2026 jijini Dar es Salaam, Kamishna wa Elimu nchini, Dk Lyabwene Mutahabwa amesema uongozi bora ni miongoni mwa misingi muhimu ya kufanikisha matarajio ya Tanzania katika sekta ya elimu.
Amesema upatikanaji wa elimu bora unahitaji walimu wenye uwezo na umahiri, ambao nao wanahitaji kuongozwa vizuri ili kufikia malengo ya ufundishaji na ujifunzaji.
"Uzinduzi wa kikosi kazi hiki ni hatua muhimu katika kuimarisha uongozi wa shule, kuboresha matokeo ya ujifunzaji na kufanikisha matarajio ya Tanzania katika sekta ya elimu kwani maendeleo katika elimu yanaletwa na elimu bora, na elimu bora inahitaji walimu bora na mahiri, na walimu bora wanahitaji uongozi bora," amesema.
Amesema kikosi kazi hicho kitakuwa na jukumu la kuishauri Wizara ya Elimu kuhusu sera, miongozo na kanuni zinazohusu uongozi na usimamizi wa shule, pamoja na kupendekeza maboresho yatakayoongeza ufanisi katika eneo hilo.
Pia, amesema kitasimamia mwongozo wa uandaaji na utekelezaji wa mafunzo endelevu kwa viongozi wa shule, kubaini upungufu wa ujuzi wa kiuongozi na kupendekeza maeneo yanayopaswa kupewa kipaumbele katika kuwajengea uwezo.
Akizungumza katika hafla hiyo, Mtendaji Mkuu wa Wakala wa Maendeleo ya Uongozi wa Elimu (ADEM), Dk Maulid Maulid amesema kikosi kazi hicho kitakuwa jukwaa la kimkakati la kuishauri Serikali kuhusu sera na mikakati ya maendeleo ya uongozi wa shule.
Amesema pia kitasaidia kuendeleza viwango vya kitaaluma vya viongozi wa shule, kukuza tafiti na ubunifu na kuimarisha mafunzo endelevu kwa wakuu wa shule na wasimamizi wa elimu.
Amesema katika utekelezaji wa majukumu hayo, kikosi kazi kitakuwa na jukumu la kuratibu programu za maendeleo ya uongozi wa shule na kufuatilia mafunzo yanayotolewa na ADEM pamoja na taasisi nyingine, ili kuimarisha ubora na viwango vya mafunzo hayo katika maeneo mbalimbali nchini.
Dk Maulid amesema pia, kitasaidia kufanya tafiti kuhusu ufanisi wa uongozi wa shule, kutambua mbinu bora za usimamizi na kuwezesha usambazaji wa maarifa na uzoefu unaoweza kutumika kuboresha uongozi wa shule.
Katika hatua nyingine, Dk Maulid amesema kupitia jukwaa hilo wamefanikiwa kuanzisha uhusiano na vyuo vikuu vinne kutoka Zambia, Botswana, Namibia na Zimbabwe, ambavyo vimefika nchini kwa ajili ya kujenga ushirikiano na vyuo vikuu na vyuo vya kati vya Tanzania.
Amesema ushirikiano huo utatoa fursa kwa taasisi hizo kubadilishana uzoefu na utaalamu katika kuleta mageuzi endelevu ya sekta ya elimu.
Kikosi kazi hicho kimeanzishwa kupitia ushirikiano kati ya ADEM na Taasisi ya African Centre for School Leadership (ACSL), katika utekelezaji wa mpango mkakati wa kuimarisha uongozi na usimamizi wa shule nchini

Back to Home
Kikosi kazi kusimamia ubora wa uongozi wa shule
Mwananchi about 5 hours 3 mins read
This article was sourced from an external publication.
Share this article
