Loading trending stories…
Muswada mpya EAC wawabana madaktari kwenye ukeketaji
Back to Home

Muswada mpya EAC wawabana madaktari kwenye ukeketaji

Mwananchi about 6 hours 3 mins read
Arusha. Bunge la Afrika Mashariki (Eala) limeingia katika hatua muhimu ya kutunga sheria kali ya kikanda inayopiga marufuku aina zote za ukeketaji (FGM), ikiwalenga wataalamu wa afya wanaoshiriki vitendo hivyo pamoja na wazazi wanaovusha watoto mipakani kukwepa sheria za ndani. Taarifa ya Eala kwa vyombo vya habari leo Jumamosi, Novemba 21, 2026 imesema muswada huo unaojulikana kama Muswada wa Kutokomeza Ukeketaji wa Jumuiya ya Afrika Mashariki wa Mwaka 2025, uliowasilishwa na wabunge wa Eala, Falhada Iman na Jacquiline Amongin, unachukua msimamo wa kutovumilia kabisa vitendo hivyo vinavyotajwa kukiuka haki za msingi za wanawake na watoto wa kike. Kwa mujibu wa nyaraka za muswada huo uliopo katika hatua ya kusomwa kwa mara ya pili jijini Arusha, sheria hiyo ikipitishwa na kusainiwa na Wakuu wa Nchi wanachama wa Tanzania, Kenya, Uganda, Rwanda, Burundi, Sudan Kusini, DRC na Somalia, itakuwa chombo kikuu cha kisheria kulinda wasichana walio hatarini. “Moja ya mambo mazito yaliyomo katika muswada huo ni kupiga marufuku kabisa ukeketaji wa kitabibu, ambapo baadhi ya wazazi wamekuwa wakiwatumia madaktari au watoa huduma za afya wenye leseni kufanya vitendo hivyo kwa siri hospitalini au majumbani,” unaeleza muswada huo. Muswada huo unatamka wazi kuwa mtaalamu yeyote wa afya atakayebainika kufanya ukeketaji au mmiliki wa kituo cha afya atakayeruhusu majengo yake kutumika kwa shughuli hiyo, atakuwa ametenda kosa la jinai. Hata hivyo, sheria hiyo inawalinda watoa huduma wanaotoa matibabu ya dharura na ushauri nasaha kwa waathirika waliokwishakeketwa. Mswada huo unaongeza kuwa ili kukomesha tabia ya familia zinazoishi maeneo ya mipakani kuvusha watoto kwenda nchi jirani kukeketwa wakati wa likizo, muswada huo umeweka kifungu maalum cha kuzuia ukeketaji wa kuvuka mipaka na kuagiza ufuatiliaji wa pamoja mipakani. Aidha, muswada huo unazuia utetezi wa ridhaa, ukieleza kuwa hakuna mtu atakayekubaliwa kujitetea mahakamani kuwa aliyekeketwa alitoa ridhaa yake mwenyewe. Pia, unaharamisha matumizi ya lugha za kejeli au unyanyapaa dhidi ya wasichana au wanawake ambao hawajakeketwa. Katika kuimarisha ulinzi, mahakama katika nchi wanachama zitapewa mamlaka ya kutoa amri maalum za ulinzi kwa msichana yeyote atakayebainika kuwa katika hatari ya kukeketwa, huku kila mwananchi akiwekewa wajibu wa kisheria kutoa taarifa pindi anapobaini mipango ya kufanyika kwa kitendo hicho. Imeelezwa kuwa muswada huo unatekeleza malengo ya Maendeleo Endelevu ya Dunia (SDG 5.3) yanayolenga kutokomeza ukeketaji duniani kote ifikapo mwaka 2030, pamoja na Mkataba wa Kuanzishwa kwa Jumuiya ya Afrika Mashariki unaotaka kufutwa kwa mila zote zinazowakandamiza wanawake. Kwa upande wake, muelimishaji jamii kutoka taasisi ya Ewang’ani Maasai Foundation wilayani Longido, Mary Laizer amesema muswada huo umekuja wakati muafaka na utawasaidia waelimishaji jamii kutoa elimu kwa upana kutokana kuzuia kuvuka kwa lengo la kuwakeketa wasichana. “Wilaya yetu ya Longido ipo mpakani na nchi jirani na Kenya,hivi vitendo vya kuvuka mpaka kwaajili ya kutekeleza mila za ukeketaji ni jambo la kawaida,tunaamini itakapokua sheria itasaidia kupunguza madhara yanayosababishwa na matendo hayo ambayo yanaacha maumivu ya kudumu kwa wanawake,” amesema Mary. Amesema elimu wanayoitoa kwa jamii ya wafugaji ni kuwawezesha kuwavusha rika wasichana pasipo kuwakeketa hatua inayowafanya wakubalike na jamii licha ya mfumo dume ambao vijana wa kiume wamejengewa wa kuwataka waoe wasichana waliokeketwa.

This article was sourced from an external publication.

Share this article
OneClick Africa Logo

Africa's premier digital hub for impactful news, entertainment, and business insights.

© 2026 OneClick Africa. All rights reserved.