Loading trending stories…
OMO ahimiza uzalishaji wa bidhaa za madini kuongeza mapato
Back to Home

OMO ahimiza uzalishaji wa bidhaa za madini kuongeza mapato

Mwananchi about 4 hours 4 mins read
Dar es Salaam. Wakati uongezaji thamani wa madini Tanzania ukiendelea kupigiwa chapuo, Serikali imesema ni muhimu kujielekeza katika viwanda vitakavyozalisha bidhaa za teknolojia kwa kutumia madini yanayopatikana nchini, hatua inayoweza kuongeza ajira na manufaa yatokanayo na rasilimali hizo. Makamu wa Kwanza wa Rais wa Zanzibar, Othman Masoud Othman amesema badala ya kusafirisha madini ghafi kwenda nje ya nchi, ni muhimu kujenga viwanda vya kuzalisha bidhaa zinazohitajika katika mabadiliko ya dunia kuelekea matumizi ya nishati safi. Akizungumza wakati wa kufunga Mkutano wa Saba wa Madini na Uwekezaji jijini Dar es Salaam leo Novemba 21, 2026 Othman amesema fursa hizo zinajumuisha uzalishaji wa vifaa vya magari ya umeme na vifaa maalumu vya kuhifadhi nishati inayotokana na jua na upepo. Amesema kuanzisha viwanda hivyo nchini kutaleta manufaa ya kiuchumi, kuongeza ajira kwa Watanzania na kuharakisha upatikanaji wa teknolojia ya uzalishaji. “Manufaa makubwa ya kiuchumi yatapatikana kwa kuanzisha viwanda vya uzalishaji wa vifaa vya umeme nchini badala ya kusafirisha madini ghafi kwenda nje ya nchi,” amesema. Suala hilo linapaswa kwenda sambamba na kuwezesha wachimbaji wadogo ili waweze kunufaika na mnyororo wa thamani kwani amesema wachimbaji wadogo bado wanakabiliwa na changamoto za teknolojia, hususan katika shughuli za uchimbaji na utunzaji wa mazingira. Amesema wakipewa teknolojia sahihi pamoja na mitaji, wanaweza kuongeza mchango wao katika sekta hiyo na kuinua kipato cha wananchi wanaoishi katika maeneo yenye rasilimali za madini. Othman amelitaka Shirika la Madini la Taifa (Stamico) na Taasisi ya Jiolojia na Utafiti wa Madini Tanzania kuendelea kuwasaidia wachimbaji wadogo kwa kutoa huduma za utafiti na uchimbaji ili waache kufanya shughuli zao kwa kubahatisha. Othman amesema Tanzania imebarikiwa kuwa na madini muhimu ya kimkakati, yakiwemo madini adimu kama tanzanite, almasi na rubi ambayo yanaweza kuwa msingi wa uwekezaji katika shughuli za kuongeza thamani. “Nitoe wito kwa wawekezaji kushiriki katika ujenzi wa viwanda vya ndani, akisisitiza umuhimu wa ushirikiano kati ya Serikali na sekta binafsi ili kuongeza thamani ya madini kwa manufaa ya uchumi,” amesema. Aidha, amewakaribisha wawekezaji kwenda Zanzibar kuchunguza fursa za madini baada ya kukamilika kwa utafiti wa jiolojia katika Unguja na Pemba, ambao umebainisha aina mbalimbali za miamba na madini yanayopatikana visiwani humo. Kwa upande wake, Waziri wa Madini, Antony Mavunde amesema Serikali inaendelea kuweka mazingira ya kuvutia uwekezaji katika viwanda vya uchakataji kwa kuimarisha upatikanaji wa malighafi, nishati, maeneo ya uwekezaji na miundombinu. Amesema sekta ya madini inachangia asilimia 10.3 ya pato la taifa na inaongoza kwa mapato yasiyo ya kodi, akieleza kuwa Serikali imeweka mkazo katika kuhakikisha rasilimali hizo zinanufaisha uchumi wa nchi. Mavunde amesema Kifungu cha 133 cha Sheria ya Madini, Sura ya 123, kinaeleza masharti ya uongezaji thamani wa madini nchini huku kanuni zikiweka viwango vya uongezaji thamani kwa aina mbalimbali za madini kabla ya kusafirishwa nje ya nchi. “Serikali inalenga kuhakikisha madini yanachakatwa, kusafishwa na kuyeyushwa nchini ili kuongeza manufaa yanayopatikana ndani ya nchi hakuna hata jiwe moja litakalotoka nchini bila kuchakatwa,” amesema. Kufanikisha hilo amesema utafiti wa kina ni muhimu ili kuongeza uzalishaji na kuhakikisha viwanda vinapata malighafi za kutosha. Kufanikisha hilo Serikali imetenga asilimia 10 ya mapato ya sekta ya madini kwa ajili ya utafiti, huku ikiandaa kuanza kwa utafiti katika maeneo mbalimbali nchini. Ametaja maeneo yanayolengwa kuwa ni Kigoma, Katavi, Rukwa, Mbeya, Songwe, Lindi na Mtwara huku utafiti huo unalenga kuwasaidia wachimbaji wadogo kuacha kuchimba kwa kubahatisha na kuongeza uzalishaji. Kuhusu nishati, Mavunde amesema Serikali imejipanga kuwa na uwezo wa kuzalisha megawati 8,000 za umeme ifikapo mwaka 2030, akieleza kuwa jambo hilo ni muhimu zaidi kwani viwanda vya kuongeza thamani ya madini vinahitaji umeme wa kutosha. “Haya yanafanyika wakati ambao eneo lililokuwa mgodi wa Buzwagi wilayani Kahama, mkoani Shinyanga limetengwa kuwa eneo maalumu la kiuchumi kwa wawekezaji wanaotaka kuanzisha viwanda,” amesema.

This article was sourced from an external publication.

Share this article
OneClick Africa Logo

Africa's premier digital hub for impactful news, entertainment, and business insights.

© 2026 OneClick Africa. All rights reserved.