Waliokuwa wakitembea kilomita 10 kutafuta maji wakabidhiwa kisima

Morogoro. Uongozi wa Kampuni ya Tumbaku ya Mkwawa mkoani Morogoro umewakabidhi wananchi wa Makunganya, Wilaya ya Mvomero, kisima cha maji safi na salama, baada ya awali kulazimika kutembea zaidi ya kilomita 10 kwenda kutafuta maji kwenye makorongo. Kisima hicho kimechimbwa katika eneo la shamba la miti linalomilikiwa na Wakala wa Huduma za Misitu Tanzania (TFS), ambalo pia limekuwa likitumika kwa mashindano ya magari yanayodhaminiwa na Kampuni ya Mkwawa. Wakizungumza baada ya kukabidhiwa kisima hicho, baadhi ya wananchi, wakiwemo wanawake, wamesema ukosefu wa maji katika eneo hilo uliwalazimisha kutumia muda mwingi kutafuta maji, hali iliyowaathiri katika shughuli za uzalishaji mali, malezi ya familia na kushiriki shughuli za maendeleo. Mkazi wa eneo hilo, Eva Siston, amesema mbali na umbali mrefu waliokuwa wakitembea kutafuta maji, maji waliyokuwa wakichota kwenye makorongo hayakuwa salama kwa matumizi ya binadamu kwa kuwa yalitumiwa pia na mifugo. “Ukiachilia mbali mateso tuliyokuwa tukiyapata sisi kina mama, lakini pia watoto wetu wadogo walikuwa wakiteseka kwa kuwa tulikuwa tukilazimika kuwaacha vitandani alfajiri kwenda kutafuta maji. Ukichelewa, tunakuta tayari maji yameshachafuliwa na wanyama,” amesema Siston. Naye Recho Daud amesema ukosefu wa maji uliathiri pia shughuli za kiuchumi na maendeleo ya kijiji hicho, ambacho kwa muda mrefu kilikabiliwa na changamoto hiyo. “Hata kipindi cha sisi kina mama kujifungua tumekuwa tukipata shida kwa sababu kipindi hicho kinahitaji maji mengi kwa ajili ya usafi wa mama mwenyewe pamoja na mtoto. Akina mama wanaotoka kujifungua wanashindwa kwenda makorongoni kutafuta maji na hivyo wamekuwa wakitegemea kupewa msaada na majirani au ndugu,” amesema Daud. Kisima chagharimu Sh30 milioni Akizungumza kwa niaba ya kampuni hiyo, Mkurugenzi wa Uzalishaji wa Kampuni ya Tumbaku ya Mkwawa, David Mayunga, amesema kisima hicho kimechimbwa kwa gharama ya Sh30 milioni. Amesema kisima hicho kina tenki lenye uwezo wa kuhifadhi lita 10,000 za maji na kinatumia nishati ya jua kusukuma maji. Mayunga amesema ujenzi wa kisima hicho umelenga kupunguza changamoto ya maji kwa wananchi na kuchochea ustawi wa jamii kwa kuwaokoa muda wanaotumia kutafuta maji, ambao sasa wanaweza kuutumia katika shughuli za uzalishaji mali na maendeleo. “Kwetu sisi maji ni uhai, fursa na msingi wa maendeleo endelevu, lakini pia ni sehemu ya kuunga mkono jitihada za Serikali na kutekeleza malengo ya Dira ya Taifa ya Maendeleo ya 2050, inayoelekeza upatikanaji wa maji safi na salama kwa wote,” amesema Mayunga. Aidha, Mayunga ameushukuru uongozi wa Wakala wa Huduma za Misitu Tanzania (TFS) kwa kushirikiana na Kampuni ya Mkwawa katika shughuli mbalimbali zinazochangia maendeleo, uhifadhi wa mazingira na ustawi wa jamii. Amewataka wananchi kutunza kisima hicho na kukitumia kwa uwajibikaji ili kiweze kudumu na kutoa huduma kwa muda mrefu. TFS: Kisima kusaidia uzalishaji miche Kwa upande wake, Mkuu wa Kituo cha Uzalishaji Mbegu za Miti cha TFS, Mohamed Msali, amesema uwepo wa kisima hicho katika eneo la shamba la miti la Makunganya utasaidia kuboresha uzalishaji wa miche ya miti. Msali, ambaye alizungumza kwa niaba ya Kamishna wa Uhifadhi, Dos Santos Silayo, amesema miche hiyo itatumika katika maeneo yaliyoharibiwa mazingira kutokana na shughuli za kibinadamu. Amesema upatikanaji wa maji katika eneo hilo utarahisisha shughuli za uoteshaji na utunzaji wa miche, hivyo kuchangia juhudi za uhifadhi wa mazingira.