Safal Alaf Foundation yapata Sh20 milioni, kutoa mafunzo ya vijana

Bagamoyo. Taasisi ya Safal Alaf Foundation inatarajiwa kuwapatia vijana wa Tanzania mafunzo ya ufundi na stadi yatakayowaongezea fursa za kujiajiri au kuajiriwa. Hatua hiyo imekuja baada ya Safal Alaf Foundation kupokea Sh20 milioni kupitia safari maalumu ya kuchangisha fedha iliyojulikana kama The Africa Rally, iliyofanyika mwaka huu kwa washiriki kuendesha magari umbali wa kilomita 6,000 kutoka Hartbeespoort, Afrika Kusini hadi Bagamoyo, Tanzania. Fedha hizo zitatumika kununua vifaa kwa ajili ya Safal Alaf Technical Training Institute, kupitia Kampeni ya ‘Miles for Education’, yenye lengo la kutoa mafunzo ya vitendo na fursa za uwezeshaji kwa vijana. Imeelezwa kuwa, elimu ni miongoni mwa vipaumbele vya taasisi hiyo katika kuwawezesha vijana sambamba na uwekezaji mwingine katika jamii maeneo mbalimbali nchini. Tukio la mwaka huu lilihusisha washiriki 50 waliokuwa wakiendesha magari ya zamani, wakipita katika nchi tano kabla ya kuhitimisha safari yao Bagamoyo. Akizungumza hivi karibuni, Mkuu wa Kitengo cha Mawasiliano na Uhusiano wa Alaf Limited, Hawa Bayumi, amewapongeza washiriki hao, akisema jitihada zao zitasaidia kukuza ujuzi wa kiufundi na fursa kwa vijana watakaojiunga na taasisi hiyo. “Kila maili katika safari hii ya kilomita 6,000 ilikuwa ni ishara ya kujituma, ustahimilivu na hatua nzuri kuelekea kuleta matokeo chanya,” amesema. Sangeet Shah, aliyeliwakilisha Alaf Limited katika tukio hilo pamoja na dereva mwenzake, Tim Pick, wakiendesha gari aina ya Mercedes-Benz la zamani, amesema safari hiyo ilikuwa ya kipekee kwao. “Lengo kuu lilikuwa ni kuchangia katika ujenzi wa Safal Alaf Technical Training Institute na tunafurahi kuwa tumeweza kukamilisha safari hii kikamilifu na kutimiza malengo, kwani taasisi hii itawasaidia vijana wengi kutimiza malengo yao,” amesema Shah. Ametoa wito kwa watu wanaotaka kuendelea kuchangia mfuko huo kufanya hivyo kupitia Jukwaa la Africa Rally, akisema dirisha la uchangiaji bado liko wazi ili kuwezesha ujenzi wa chuo hicho. “Natoa wito kwa watu kuendelea kuchangia ili kuwezesha ujenzi wa chuo hiki cha AlaF ambacho kitawanufaisha Watanzania wengi,” ameongeza. Naye Pick amesema tukio hilo limewapa uzoefu mkubwa, hasa kwa kuwa walishiriki kwa lengo la kuchangisha fedha za kuwezesha ujenzi wa chuo hicho. Muandaaji wa tukio hilo, Paul Clayton, amewapongeza madereva hao kwa uamuzi wao wa kushiriki kwa madhumuni ya kuchangisha fedha. “Zaidi ya Randi milioni 1.1 (Sh173 milioni) zimekusanywa kupitia tukio hili na zitasaidia katika nyanja mbalimbali. Chuo cha Ufundi cha Alaf kitapokea takriban Randi 119,000 (Sh20 milioni), ambazo zinaweza kuongezeka kwani dirisha la kuchangia bado liko wazi kwa mwezi mmoja kuanzia sasa,” amesema Clayton. Pia, Clayton ameishukuru Serikali ya kupitia Bodi ya Utalii Tanzania kwa ushirikiano walioutoa katika kufanikisha tukio hilo, lililoanzishwa miaka mitano iliyopita na mwaka huu likihitimishwa Bagamoyo.